Ladki Bahin Yojana November December Installment Update: महाराष्ट्र राज्यातील लाडकी बहीण योजनेच्या अनेक महिला लाभार्थ्यांना नोव्हेंबर आणि डिसेंबर महिन्याचा हप्ता अद्याप मिळालेला नाही. साधारणपणे १० ते १२ टक्के महिलांच्या खात्यात हे पैसे जमा न झाल्याने गोंधळाचे वातावरण आहे. तांत्रिक कारणांमुळे किंवा अर्ज भरताना झालेल्या चुकांमुळे हा लाभ थांबवण्यात आला आहे. तुमचा हप्ता कोणत्या कारणामुळे रखडला आहे आणि तो पुन्हा मिळवण्यासाठी काय करावे लागेल याची सविस्तर माहिती खालीलप्रमाणे आहे.
हप्ता न मिळण्याचे मुख्य कारण ई-केवायसी मधील चुका
अनेक महिलांच्या अर्जाचे स्टेटस तपासले असता, त्यामध्ये ‘Rejected’ असे दिसत आहे. रिमार्क मध्ये ‘E-KYC Government Employee’ असा उल्लेख करण्यात आला आहे. याचा अर्थ असा होतो की, संबंधित महिला किंवा तिच्या कुटुंबातील सदस्य सरकारी नोकरीत आहेत. प्रत्यक्षात अनेक महिला सरकारी नोकरीत नसतानाही सिस्टीममध्ये ही चूक दिसत आहे. ही चूक ई-केवायसी प्रक्रिया पूर्ण करताना विचारलेल्या प्रश्नांना चुकीची उत्तरे दिल्यामुळे झाली आहे.
ई-केवायसी दरम्यान दोन महत्त्वाचे प्रश्न विचारले गेले होते:
१. कुटुंबातील सदस्य सरकारी कर्मचारी नाहीत किंवा निवृत्तीवेतन घेत नाहीत का?
२. कुटुंबातील केवळ एक विवाहित आणि एक अविवाहित महिला लाभ घेत आहे का?
या प्रश्नांना ‘होय’ किंवा ‘नाही’ निवडताना अनेक लाभार्थ्यांचा गोंधळ झाला. ज्यांनी नजरचुकीने चुकीचा पर्याय निवडला, सिस्टीमने त्यांना आपोआप सरकारी कर्मचारी म्हणून गृहीत धरले आणि त्यांचे हप्ते थांबवले.
दुरुस्तीसाठी दिलेली मुदत आणि सध्याची स्थिती
राज्य सरकारने यापूर्वी ज्या महिलांची ई-केवायसी चुकली होती, त्यांना दुरुस्तीसाठी ३१ डिसेंबरपर्यंत ‘Edit’ करण्याचा पर्याय उपलब्ध करून दिला होता. ज्या महिलांनी दिलेल्या मुदतीत आपला अर्ज सुधारला, त्यांना नोव्हेंबर आणि डिसेंबरचे हप्ते मिळाले आहेत. मात्र, ज्या महिलांनी या कालावधीत दुरुस्ती केली नाही, त्यांचे हप्ते आता पूर्णपणे बंद झाले आहेत. सध्या पोर्टलवर ऑनलाइन दुरुस्तीचा कोणताही पर्याय उपलब्ध नाही.
रखडलेला हप्ता पुन्हा मिळवण्यासाठी काय करावे
जर तुम्ही पात्र आहात आणि केवळ तांत्रिक चुकीमुळे किंवा नजरचुकीने झालेल्या ई-केवायसी त्रुटीमुळे तुमचा हप्ता थांबला असेल, तर तुम्ही खालील उपाययोजना करू शकता:
• पंचायत समितीला भेट द्या: तुमच्या तालुक्यातील पंचायत समिती कार्यालयातील ‘महिला व बाल विकास विभाग’ येथे जा.
• आधार कार्ड आणि मोबाईल नंबर: सोबत आधार कार्ड आणि अर्जाशी लिंक असलेला मोबाईल नंबर घेऊन जा. तिथे तुमचे स्टेटस पुन्हा एकदा तपासून घ्या.
• लेखी अर्ज सादर करा: जर तुम्ही पात्र असूनही हप्ता मिळत नसेल, तर तिथे संबंधित अधिकार्यांना एक लेखी अर्ज द्या. अर्जामध्ये तुमची चूक मान्य करून तुम्ही पात्र असल्याचे कागदपत्रे जोडा.
• दाद मागणे: पंचायत समिती स्तरावर जमा होणाऱ्या अर्जांची दखल घेऊन शासन स्तरावर त्यावर पुन्हा निर्णय घेतला जाऊ शकतो. त्यामुळे अधिकृत तक्रार नोंदवणे आवश्यक आहे.
योजनेचा लाभ सातत्याने मिळवण्यासाठी शासनाच्या मार्गदर्शक सूचनांचे पालन करणे आवश्यक आहे.
हे देखील वाचा: मोफत 7/12 उतारा डाऊनलोड करा मोबाईलवर; पहा नवीन पद्धत 2026